newsletter 3

Newsletter #3

Date October 6, 2004

Hallo zäme!
Jo, es esch weder mol Ziit, dasi mi weder mälde. Ben jo scho es Ziitli do, ond halt au beschäftiget, im Gägesatz zo mine FH-Kollege ide Schwiitz.
Im Momänt esch alles chli Alltag worde. Das heisst, es get en feschte Wocheablauf, MO & MI und DI & DO send zemmli glich well mer det di gliiche Kürs händ. Was me vor allem ergendwie chli erstuunt het, isch, dass mer no rächt vell Huusufgabe mache müend. Ich meine im Spanisch isch es logisch, aber dass mer au bi Mikroprozessore und VHDL fascht jedi Woche öppis mues abgeh wo korrigiert wird und Note git, vo dem het mer niemert öppis gseit. Aber ich glaub die wössed scho werom, ond ich be jo ned de Typ wo so Sache freiwillig mache wör...

Aber a de Wochenänd werds ois also nie langwiilig, ond ergendwie send die fasch no chürzer als ide Schwitz. Eigentli fohts jo scho am Fritig Mittag aa, wenn mer a das Träffe vo de Internationale Studente gönd, die "Coffee Hour" wo jedesmol es Land ergendöppis chochet, chli Fahne ufhänkt, chli dekoriert und mer meh öber das Land und ehri Eigeheite cha erfahre. Meischtens nützed mer eifach die Ziit det zom met anderne zplaudere. Ergendwenn müemmer denn ami abdüüse, well am 2 am Strand unde oisi Wassersportlektione aafönd. Ond nach dene esch denn ami relaxe am Strand oder ergendöppis Uusgangsmässigs aagseit.

Ich ha oi jo gar nönig verzellt dass mer scho uf Mexico gange sind. Gnauer gseit uf Tijana. Eigentli semmer nome zomig det gsi, und eigentli hämmer öberhaupt nüt gseh vo Mexico, ossert de Gränzübergang, s'innere vomene Taxi ond es total abbruchriifs Gebäude mit Lärm (es sött en Club sii...). De Sinn vo dem Gebäude isches, möglechscht vellne zjunge Amis "FUN" zbüüte. Die arme junge Amerikaner zwösche 18 und 21 send jo scho soo erwachse, möchtet sooo gern Party mache, aber döfed jo in Amerika kei Alkohol trinke. Tja, das isch ebe s'Gsetz. Dorom gönd si in Masse öber Gränze und lönd sech WÜESCHT d'Kappe fölle. Aha, du frogsch dech jetzt was mer det verlore händ?! Gueti frog. Es loht sech velecht demet erchläre dass mer do in San Diego emmer ghört: Hey, let's go to TJ, there is always party party party... Aha, jo werom ned, isch jo ned verchert... Aber im nochhinein merksch, die wo das säged send halt ebe Amis gsi sind wo au onder dem u21-Joch händ müesse dure. Also um ehrlich zsii, es isch de grusigschti Club gsi woni scho je gseh han. Stell der eifach e Holzhütte vor, met chli Boxe und chli platz zum umestoh. jo ned vell meh. Zwoitens, es het bi wiitem di hässlechschte Drinks geh wo ni scho je abegwörgt han. (Ond das heisst also au ned nüt, ich ben scho bide Profi-Panscher zAyianapa gsi und ha scho de Regula ehri obermegagrusige Drinks ade Cocktailparty probiert.. :-) )
Ond denne send halt no d'Lüüt. Ich meine ich stoh ami schochli aa wenn oisi liebe Osteuropäer ehri krasse Moves möched ide Clubs um ergendwelchi Fraue z'beiidrocke. Hmm, mech donkts do seit mer dem eifach RnB, alli möcheds und alli (Girls und Guys) fendeds geil. Ich weiss ned öb ich öppis falsch verstande ha, aber es isch do glaubs aabrocht das mer eifach öberleit was jetzt de "Chef-Kebab-sowieso" wör för en Show abzieh und denn gnau das macht. Chas jo eigentli ned sii, aber i dere Beziehig muesi nochli Recherchiere. För all die wo jetzt kei Plan händ vo was ech grad gredt han: Vergässids. Esch ned so wechtig. Und Details erspari lieber grad allne.

Aber ussert TJ send mer ebe no im Seaworld, amne PADRES Baseballspeli und ide Wüeschti gsi. Zom Seaworld und Baseball weiss ich gar nüt z'schriibe, er chömed aber en Idee öber wenn ehr d'Föteli aalueged. Das met de Wüeschti isch aber no rächt beiidrockend gsi. Mer händ amne Usflog teilgnoh vo de International Student Association, vo ne Campingplatz buechet het zmetzt im Niemandsland. Stell der eifach vor, du fahrsch för 1,5h eifach us San Diego use, uf de Autobahn rechtig Landesinneri. Nochere halbe Stund gsehsch so die letschte paar hüüsli und werbeschilder, nochher chömed nome no Stei, Notruefsüüle, Büsch und Sand. Aber trotzdem fahrsch no e ganzi Stund oder nomeh eifach wiiter. Es goht chli duruuf und durab, Stei, stei, Büsch Büsch, Stei, notruefsüüle, Büsch, Büsch, oh en Baum, Stei.. usw.. Ergendwenn fahrsch dur es Indianerreservat met 2 Casinos, denn weder nüt (oder ebe büsch, büsch, erwössedjowas).. Anere bestimmte usfahrt muesch use, es het en Tankstell (super he!) und es Restaurant (het sogar offe und es git gueti Pizza). Jetzt muesch nome no 45min eifach nach Norde fahre, ufere normale Stross, met Kilomterlange grade Stückli und weder rächt luschtige kurvige abschnitt (halt ine canyon abe oder weder use). Nätterwiis tüend d'Amis so all 1 oder 2 Meile en blaui Fahne näb es blaus Fass an Strosserand, met Wasser drin. Das seig för die illegale Iiwanderer vo Mexico, wo sech dors Niemansland öber Gränze id USA inemogle wänd, hani vernoh. D'Gränze isch det ebe zemmli näch, und es seig halt eifach so dass halt es paar Lüüt chli warm öberchömed und ergendwenn kei Wasser meh händ. Ond es isch wohrschinli ned de Plausch ohni Wasser. Ond d'Amis wo det wohned, (eis huus i paar quadratkilometer) ich glaub ned dass die armi Mexikaner uufnämed... Aber esch jo gliich: Mer send also denne ufne Campingplatz cho. Eifach es iighagets stück wüeschti, met WC-Aalage undme Pool... Natürli isches scho dunkel gsi womer am Fritigobig det aacho send. Aber esch uf all Fäll en luschtige Obig gsi, mer het vell plaudere, ässe und trinke chönne. Die Sache gnüüssi do so rechtig. Ech lehre so vell Sache, vo denne ich vorher kei blasse Schimmer gha han. Ned well ech en Fläsche in Geo oder Gschicht gsi wär, (ech säge ned ech seig guet..) aber verdammt vell chasch eifach nome wösse wennd äntwäder det gsi besch oder met ergendwem vo det es Ziitli plauderisch. S'beschte fendi eifach, dass es emmer es paar Spanier, Mexicaner oder suschtigi Latinos debi het, die möched emmer chli Spröch und Faxe, was eifach zum goisse esch. Spöter ide Nacht send denn es paar uf e "Wanderig" ... hmm .. ich gebes zue, ben zfuul gsi. Aber es esch eifach vell zgmüetlech gsi am Füür bi Vollmond met eme Mänsch vom andere Ändi vo de Wält zdiskutiere.. (i dem Fall Tahiti.. weisch wo das esch? Scho easy hani nome de Name kännt und soscht kei blasse gha. Wennd auno weisch was förne Sproch det redet besch min Held...). De räscht vo dem Camping-abentüür isch schnell verzellt, en chorzi chalti ungmüetlechi Nacht im Zält, es verdammt heisses zmorgeässe und zämeruume am spötere Morge und es Autofahrt zrugg id Zivilisation... Ich nehme mol aa mer schaffeds no es paar Föteli us dere Gägend is internet z'stelle ;-)

FORTSETZUNG FOLGT....

Grüess

Mario