newsletter 4

Newsletter #4

Date December 21, 2004

Jä grüezi grüezi!
Jo, do stuunsch, he! Has doch weder mol gschafft es paar Taste zdröcke ond es Email z'schecke.. Es esch zwar scho lang her sit em letschte, aber beklagt het sech fascht niemert. Jo also, denn fangi halt mol afe brechte..
Es isch zimmli vell gloffe letschti, set ech oi noch dem Trip id wüeschti mini letschte Erfahrige metteilt ha. So hämmer zum Biispel oisi Amerikanischi Erfahrig ums Kapitel "Basketball" und "American Football" ergänzt. Mer send also go d'Collegemannschafte vo oisere Uni go luege, "AZTECS", nänned sech die. Also im Football sends glaub zemmli übel.. Luegid eifach mol d'Föteli aa, es esch no zimmli beiidrockend, das ganze trariitratraa oms spel ome. S'Stadion esch för mini begriff no es zimmli grosses, ond es het au meh lüüt als amne durchschnittliche Schwiizer Nati-A Match. Aber ebe, ich rede do vo American Football, ned vo Soccer. Das sind jo ebe die schlaue cheibe met de ritterröschtige wo ächli imne Ei nocheseckled und echli ufenand umetrooled.. Also am Fernseh gseht mer wenigstens die Helde vo nächem... aber im Stadion isches halt zimmli wiit weg, has Gfühl gha chomes ned so met öber. Und di ganz Ziit werd abpfiffe, gwarted bis weder alli ufgstande sind, ergendeine sEi gfonde het, alli mindestens einisch a bode gsabbered händ, und denn gohts denn vilicht i di nöchste 30 Spelsekunde. Also mer merkts secher, ich ben alles anderi als begeisteret gsi. Aber zu allem äne goht de Gspass eifach no stundelang. Vorsichtig gschätzt isches öppe 3h gange.. isch jo ned nüt.. aber mer esches no veeel länger vorcho.. Aber: Ich has versuecht. Basketball degäge isch no zimmli akzeptabel gsi. Det bisch nöcher dra, es lauft chli öppis, isch chli stimmig ide hötte. Jo die Hötte isch es öberdeckts Rund, COX Arena heissts. Jo, ond si ghört zum Campus vode Universität. Det send ami auno Konzärt vo Berüemtheite wie Norah Jones, Beastie Boys, Green Day, uva. Tickets för die College-Speli sind öbrigens för ois Studänte gratis, das esch doch no flott. Also anes Basketballgame gangi secher weder mol, obwohl ich jo gar ned eine ben wo so Sport-Zueluegesupi fendt.
Leider verpasst hämmer die Fraue-Fuessball Mätsch. Das sig no poppig, hani mer lo säge. Luschtig wärs no gsi well eini us oisere Spanisch-Klass det mettschutted. Ade erschte Täg hend de Mirko und ich g'werweiset was das ächt ehres metier esch, well si ide Lehreri gseit het si chönni denn ned emmer cho, well si imne Sportteam seig. Mer händ ois denne uf Cheerleader g'einiget. Jo das isch also wörkli no naheliegend gsi, söttsch die gseh.. Apropos Cheerleader. Das isch natürli au tüppisch amerikanisch. D'Uni het es eignigs Cheerleader-Team, wo die Aztecs bi allne Spel goht go aafüüre.. Wenigschtens öppis förs Aug, sägi do nome.. Ond zwöschedore hends wohrschinli äxtra för mech no sone Dance-Squad ufs Fäld gstellt, wo so HipHop Dance Performance zum beschte geh het. Im nochhinein gseh isches worschinli das gsi wo verhendert het dasi bim Footballspel iipennt ben.
Sovell zu de Sportsache vo de Uni. Gebes zue, han jetzt doch keis Basic-Training als Cheerleader gmacht.. ;-) Deför hani es Sörfbrätt kauft. Ond ben au scho ab ond zue demet go üebe. Läck mer, das isch öppis wie eiradfahre.. gseht verdammt easy uus und esch doch ned mol so eifach ;-) Mettlerwiile chanis zwöschedore schochli gnüüsse... ich verzell jetzt aber äxtra ned wasi chan ond was ned... Ond bevors vo öpperem anderem ghörtsch... jooo, ich ben ami ned so fliissig met ufstoh am morge zum go sörfe.. Ich be zemmli oft leggeblebe.. wenn de Mirko i aller herrgottsfrüei is Auto ghocket isch und an Strand gfahre isch. Ich bruuche glaub chli meh schloof, ond gmüetlech nochli legge und chli umehange am morge isch halt auno schön.
Was selli soscht no verzelle? Wie'd Schuel gsi esch? Wörkli? Also mer hets rechtig gfalle. Amel fascht alles. Spanisch isch eifach super gsi, ussert das Workbook met üebige womer emmer vor de Prüefige het müesse fertig ha. Has natürli ami am obig vorher no müesse herestresse.. bruucht stunde.. Aber suscht isches no glatt gsi. Di liebi Georgina, oisi Lehreri, het aber chli en Macke.. si het glaubs en Schueh-Tick. Si het ohni Seich secher öber meh als 2 Woche i jedere Stond es anders paar schueh aagha. Ond mer händ jo doch 4 mol Spanisch ide Woche... aber de ned öppe schöni Schüeli, nenei... sind glaubs di grüüsigste woni scho je live gseh han. Eifach abartig hässlechi Farbe und Forme.. Aber woni sälber uf shoppingtour gange ben, hani glaub di gheimi Schuequelle entdeckt: Es get sone schuehlade wos jede schueh för 10 Dollar get. S'het aber nome Fraueschueh ond ebe glaub kei einzige schöne.. Uf all Fäll het ned emol Priska wo us de schwitz isch cho es bsüechli mache det sones paar Stefeli wellä poschte.
Aber bliibemer no schnell bide Schuel.. ha no es paar Projektli döffe/müesse mache. Di super VHDL-Programmierüebige hani freiwellig elei gmacht.. suscht hetti secher drüümol länger gha weni das dene Ami-Banause no hetti müesse erchläre.. ond ben doch einigermasse fertigworde, und funktioniert het au (fascht) alles. Aber i mim Mikroprozässer-Kurs isches es Group-Project gsi. Hmmm han met me tüpp us sri lanka, met me vietnames und ere vietnamesin döffe ide gruppe sii. De us sri lanka isch no es schlaus bürschtli gsi, sin kollege deför umso weniger. Er isch denn halt för s'Ressort Verpflegig und Screenshots iiteilt worde, das heisst er het bildli umekopiert und redbull und (natürli megagruusigi spicy) Pommes-Chips organisiert. Mer andere hend denn halt müesse Code entwickle und die böse böse Simulationsprogramm am richtige ort chutzele bises funktioniert het. Isch aber mega interessant gsi, obwohl ich wäg dere super sach es ganzes wochenänd ide schuel ha döffe "verläbe"... aber da möched jo sowieso vell meh do. Z'windisch isch das halt nome oise Florian ;-)
Jo aber i einere Klass hani jo wohl glaub gar nüt begriffe... DSP.. Digital Signal Processing. Tönt jo mega interessant, aber de lehrer isch chli öberegheit, de macht da züg halt schochli zlang. Ich ben det halt eifach chli gsässe, han vöregstieret und chli notize gmacht.. esch chli vell Mathi gsi för mis Gusto.. aber ich hoffe mol ech mues da ned wörkli alles kapiert ha för de räscht vom Studium.
Jo vori hani jo schomol gschrebe vo wäge Bsuech: De Thomas Jäger isch met sim Schwösterli uf bsuech cho, för chli me als 2 Woche. Noch eis zwoi täg do in San Diego sinds aber verduftet, met me Mietauto go Kalifornie erobere.. ond mer händ müesse oisi Abschlossprüefige mache... Nochdem mer denn das hender ois brocht gha händ, semmer met s'Jägers is Disneyland uf Los Angeles. Das isch im Fall absolut super gsi, ganz ganz schön und au es paar super Bahne hets gha, so gförchigi "elevators" und achtibahne.. fairerwiis händs mer ami ned gseid was mi erwarted, so beni ami ABARTIG verschrocke... also einisch hani wörkli gmeint es gäb mer öppis..isch chli dunkel und so, muesch di aagurte.. na ja ... fahrsch chli ufe.. immer no dunkel... plötzli möcheds vore d'feischter uuf, gsehsch dass uhuere höch obe bisch...... und denn gheisch met dem ganze verdammte Lift s'Loch ab. Ned mol so fair, find i. Wenigstens händs mini Begleiter loschtig gfonde...
Ond en super Alladin Show händs.. so nes riise Theater wie öppe s'Operehuus z'Züri (för die wo das känned..) und natürli het au en rechtige Flüügende Teppich ned gfehlt.. Flüügende Teppich? Du spennsch... Nei wörkli... die send öber de Zueschauer gfloge, oder besser gseit uf me Teppich a schnüer ghocket. Jo aber de het chönne ufe ond abe und i Kreisbahne umeflüüge.. ganz genial.. Ond denne händs no die super Lieder vo Alladin live gsunge.. ganz schön gsi die Show. Ond d'Bühnebelder hends so schnell chönne wächsle wie imne Duumekino.. Met andere Wort: Sackstarch!

Also ich wett do nömme länger wärde.. obwohl ich no einigi, nei ganz vell Sache ussegloh han. Aber es paar Sache werd ech eh ned verzelle, zum einte well mers nome cha met eigne Auge und Ohre wohrneh, zum andere well echs chum cha i Wort fasse..

Also denne, chomi doch no zumne Änd: Wönsche der ganz ganz schöni Wiehnachte, gnüss die Ziit woauemmer du si verbringsch.
Merry Christmas!

Grüess vomne schneearme teil vo de Wält...

Mario

Öbrigens: grad vori hämmer no e ladig Fotene ufs WältWiiteWundernetz glade.. www.sandiego.sytes.net