newsletter 5

Newsletter #5

Date February 4, 2005

Hallo zäme

Ich mälde mech hött us Merida, Yucatan Mexico. Es isch einiges passiert sit em letschte Mail vor Wiehnachte. Isch jo au en rächti Ziitspanne. Aber ich probiere chli schnell durezspuele.
Also Wiehnachte han ech so quasi s'erscht mol ohni mini Familie und ohni s'typische schwiizer graue Wiehnachtswätter verbrocht. So beni zom biispel am 24gischte am morge go sörfe. Ond de 25gischt hani met de "noie" San Diego Famili verbrocht, be met em Mirko und anderne bi oisem Mentor Päärli Gigie und Larry iiglade gsi. Det hets weder suuuuper z'ässe geh. Es esch total anderscht gsi als Wiehnachte dihei, ned nome s'ässe, au s'gschänkliuuspacke und alles drum und dra. Es het halt weder Lüüt gha vo öberall. Studente und Frönde und Familie vo oisne Mentore. Stelled oich eifach au no so ikone vor wie en Mathelehrer churz vor de Pension wo voll vo UFO's aagfrässe isch. Root mol vo was er währed em ässe verzellt...
Öber die Ziit sind au no eis zwoi drüü vier lüüt vo oisere FH-Klass uf San Diego cho, zum ois cho bsueche. Gliichziitig sind aber oisi noigwonnene Frönde eine noch em andere i alli Wält abgreist. Das isch chli es komisches Gfühl gsi. Di meischte sind jo scho zimmli usser Riichwiiti, dihei in Singapur, China, Korea, El Salvador oder wo halt au emmer. Aber ich hoffe ganz fescht dass die Lüüt au mol id nächi reised, oder das ich weder mol met em Flugi chli wiiter höpfe chan.
Met ebe dene Gescht us de Schwiiz sind mer den uf Las Vegas. Well mer ned hend wellä es äxtra Reiseauto miete, send mer det met em Greyhound-Bus he. Zieht sich halt uf öppe 9h he. Aber mer cha jo schloofe oder die abartig unspannend Wüesti aaluege. Z'Vegas isch es aber för min Gschmack supi gsi. Mer sind eifach umezoge, hend glaub alli Kasinos am Strip aaglueget, und au chli Gäld i de Automate verstaut. S'komische isch ami eifach, wenn weder de Schäfer EIN münze in en noiie automat inetoo het und EINISCH dröckt het und halt grad weder 3 oder 4 usecho sind. Also ich be scho ergendwie chli hangeblebe a dene einarmige bandite. Isch halt no speziell, wenn chli günnsch und denne uf Cash dröcksch unds en Glacechübel mit so 5cent stückli füllt. Am erschte Tag bini glaub met de Slotmachines sogar es paar Dollar im plus gsi, am woite Tag hets demet deför gar nömme klappet. Aber deför hani denn noch langem öberlegge und hin und her au mol 20 Dollar riskiert und chips för BlackJack glöst. BlackJack isch das Chartespeli mit de Bank, wo mer ned sött über 21 ha. Mindestiisatz isch 5 Dollar gsi, dorum hani mers au laaaang öberlegge müesse. Aber met abartig pochendem Herz beni denn det a dem Tischli ghocket, met no drü oder 4 anderne gäge die Asiatin wo öber die ganz Ziit kei Miine verzoge het, ich glaub dere sind alli Gsichtsmuskle abgstorbe. Jetzt muesch aber lose: Ich han also met 20 Dollar aagfange, das isch denn zimmli schnell uf nome no 10 abe, aber denn isches nome no ufe. Ich ha denn sogar no en Hammerschluss änegleit, mit zwoimol Blackjack noch splitte. Denn hani natürli gseit: STOPP!! Bim zruggwächsle sinds denne 55 Dollar gsi... juhee...!! Aber Las Vegas isch gföörlech, glaubi. S'verhältnis zu Geld nimmt krankhaft lächerlechi Forme aa.

Sylvester isch zimmli es truurigs Kapitel gsi. Ned wie du jetzt dänksch, nei, sondern well de Klub womer gsi send scho am halbi 2 zuetoo het. AM SYLVESTER!! Mer send also öppe am 2 dihei gsi und hend dänkt, das chas jo NED sii... Aber denn heds mer dämmeret wieso scho all Lüüt dete am 10ni womer cho sind zimmli beschwipst gsi sind. Tja, 2005 isches jo trotzdem worde.
Im neue Johr sind denn wiiteri verabschedige aagstande. Truurig truurig. Met de Japaner hemmer no es Fondueässe gmacht, statt es Rechaud uufztriibe hend mer Ingenieure natürli usegfunde dass es au met em elektrische Riis-Chocher goht. D'Fotene defo sind scho länger online, bi halt chli hindedrii met brechte.

Aber denn isch halt oisi San Diego Ziit z'änd gange. Mer hend packt, und sind vomene Kolleg a di Mexikanisch Gränze gfahre worde. Well mer hend di belligschte Tickets uf Mexico City wellä, und die sind halt vo Tijuana in Mexico, aber es isch jo nöch. Es isch natürli chli es Drama gsi det dene Ami-Gränzer klarzmache das mer uf Mexico gönd und ned weder zruggchömed, si also gfelligscht ehre Fötzel us oisem Pass neh und ihrem System verzelle sölled dass mer also offiziell gange sind. Dasch nämmli no wichtig wemer im Fall wieder mol id USA wänd. Das hetemer also gschafft gha. Deför hend mers au gschafft ohni Stämpfel und Papierli uf Mexico zcho. I oisem Pass gseht mer ned wenn wie wo mer uf mexico cho send. Hoffe mol da git kei Problem, denn eigentli müesste mer sone Tourist-Card dinne ha.
Mer sind denn also mit em Taxi uf Tijuana und met em Flugi uf Mexico City. Di super idee met em Mitternachtsflug zgoh, isch insofern ned so Hammer gsi, well mer zwar scho am morge am 6si det aacho sind, es aber dummerwiis 2h Ziitverschiebig get zwösche Kalifornie und Mex City. Das heisst de Flu isch nome 4h, und mer hend ned aanöchernd sovell gschlofe. Und was macht mer am morge am 6si inere riise Stadt met abartig vell Gepäck (met Sörfbrätter!!): mol warte...
In Mexico City sind mer denn halt es paar Täg blebe, so bes mer gmerkt hend, dass es ned so en ideale Ferieort isch. Mer hend zwar imne Tagesuusflug no di wörkli grosse Maja Pyramide in Tenochtitlan aaglueget, was zimmli iidröcklech gsi esch. De räscht isch aber ned so hammer gsi. Vor allem dass ich ide Metro mis Portmonnee a bedürftigi Gangster verschänke ha müesse.. Das isch en zimmliche Stimmigskiller. Im Nochhinein wör ichs als 20% fahrlässigkeit iistuufe (öberhaupt gäld debiizha, ufbewahrigsort) und 80% under "professionalität" vo de abnehmer verbueche. Naja, ich lebe no, ha no Pass und Tickets. Und de Plausch am reise isch au weder cho.
Nächschtig Statione sind Acapulco, Cancun und Merida gsi. Di erschte beide am Meer. Das send vell schöneri Ort als di gruusig Hauptstadt. Aber gmacht hemmer dete ned so vell, eifach chli Ferie halt. Umeligge, bade, sörfe, schloofe, ässe...

Sodeli.. ich glaub das mues weder mol lange.

Ich nehme also no die letschte 2 Woche Ferie a de Wärmi in aagriff, bevor ich am 16te Februar weder i de Schwiiz si werde.

Bes denn, wönsch ich allne en abartigi Fasnacht oder suscht e super Ziit. Hoffe es isch mindestens erträglech chalt.

Grüess vo under de Sunne

Mario