newsletter 1

Newsletter #1

Date August 20, 2004

Hey Swiss Folks!

So langsam esches Ziit dass ech mech mol weder mälde. Be jo jetzt sit em Mäntig morge weg, ond ja doch einigi kilometer oder ebe miles zroggleit, ond au es paar loschtigi Sache erläbt.
Also am Mäntig morge beni met em Zug uf de Flughafe, ech meine, mini Eltere hetted mech jo sco chönne ergendwohe fahre, jo, aber ich ha gnau gwösst dass mer denn soo mega rüeh müessted go, dass ech gradsoguet cho z'Bosmel uf de Zug. Dass mer uf Amerika döff Handgepäck plus zwoi 32kg schweri Koffere metneh esch zwar eigentli kei Seich, aber träged die mol uf em Bahnhof umenand... Vor allem wennd s'Gfühl hesch, du müessisch z'Züri mol ufs Gleis 53 goh, well denne früener am Airport bisch.. Mini JAcke stinkt jetzt no nach dene 3 Liter Schweiss woni det abdröckt han... :-(
Aber iichecke isch eigentli scho no easy gsi, mer händ jo Ziit gha. Ond wenn emmer seisch das nome en harmlose Student ond kei Taliban bisch, denne bliibeds au zemmli fründlech. Es isch denne ned allzuschwerig is Flugi z'stiige und rechtig Staate abzhebe. Mer stuunet denne scho s'erscht mol dass alli Infos natürli uf änglisch und is so Füess und Fahrenheit aageh sind, obwohl kei Mänsch weiss wievell das wörkli esch... Ond bi demm Bildschirm womer Europa und Amerika gseht met de Flugroute, det hets zwar en Flüüger droff, aber de bewegt sech ned wörkli, obwohl mer met 900 Sache öber de Teich flüügt. Ich ha denne dänkt dass es dra legge chönnt das mer schiints me als 9 stond flügt uf new york. Aber mer cha jo film luege und musig lose.. sogar game chönnt mer (wenn die wüssted wiemer da system aktiviert oder müesst mer doch business bueche..? )
öbrigens.. 9 stond flüüge esch gar ned eso schliim.. zumal de frass eigentli no hesch chönne abeschlöcke...
In NY hemmer denne d'Chance gha mol di geili Skyline z'fötele.. eifach zemmli entfernt. Mer änd denne dänkt mer froged jetzt niemert wo den Twin Towers siged.. ;-)
Loschtig esch auno dass es grad öppe alli verschidene Fast-Food und andere Amerikanische Take-away stores grad i jedem Terminal Tür-an-Tür het.. mer ois denne mol en american-style-pizza aatoo.. Be mer ned ganz secher öb Gwürz in USA verbotte sind.. Isch no luschtig gsi dass ois grad sones jungs ami girl aagsproche het, wo si ois met me rote pass gseh het umehantiere und so komisch rede ghört het. Mer händ denne müesse verzelle dass mer us de Schwiiz sind, und sogar Snowboarde chönd. Si het denne nome gmeint si seig mo z'belgie gsi, ond det go snöbe. und das seig also no zemmli hammer gsi. Ich has Gfühl gha ich säg jetzt ned was för Berge d'Schwiiz het.

Aha jo: Ech be no nie im mim Läbe so lang aagstande wie bi de Immigration in NY. Es nemmt scho Europapark usmass a. Und die officers lueged chli bös, scanned dini fingerli, froged nochli blöd ond denne bisch drin. Denne holsch dini Koffere, muesch dire Zoll und schleiksch si weder es paar Rollträppe met und gesch si weder ab. Natürli müends denne nomol öberall inegügsle.. Im zwoite Flüüger uf San Diego hets scho am aafang zimmli gharzet. Äntwäder hend im Tower zimmli ghetto gha oder oise Pilot et sech chli chli unbeliebt gmacht dete. Mer händ also doch mehreri Runde uf de Taxiways dreiet uf dem doch no grosse Flughafe... und heiss isches au gsi im Flüger. De Gipfel isch denne aber gsi, dass mer wörkli ABARTIG grusigs ässe übercho hend... ech meine mer send denne scho öppe 15h uuf gsi, aber ergendwie esch emmer no erscht nomittag gsi. Und denne sone Chicken burger wo glaubs 1-2% füechtigkeit gha het, also doch no zimmli troche gsi esch. Zum Glöck het de Mirko es Föteli gmacht..

Aber ergendwenne bisch denne so kabott dass sogar es paar minüteli schloofsch. ond es werd sogar dunkel dusse. in San Diego hesch nochher kei einzigi Kontrolle me, kei billet zeige, kei Pass, nüt. (Isch jo en inlandflug) Scho easy cha aber jede wo vom taxistand dor glastüre inelauft dini koffere vom band neh... Watch out!
Aber immerhe.. vo 5 gepäckstück, devoo eis Sperrgut-Didgeridoo sind also doch 5 acho. Ech findes eifach chli unfair dass im Mirko sis Douchegel us sinere Täsche usegumpet und sech schön a min koffer und mini Täsche verteilt het ergendwo zwösche NY und San Diego. Das esch NED loschtig.

Aber zum Glöck simmer nochher schön is oisi temporär unterkunft schoffiert worde. Unpassenderwiis im Viertel Hillcrest, aka Gaytown. Ich ha zwar no nüt verdächtigs gseh, aber es het mega vell restaurants, bars, shopping malls usw. Ond es het free internet access a 4 computer und wireless access. Das esch doch no en lobby, womer eifach cha ufne Sässel höckle und so Mails wie das do schriibe..

Underdesse hämmer au scho en Rännchare gmietet... zom Glöck hets kei Farzüguswiis ome, soscht chönnt ech oi gnau säge wie mega alt die schissi isch. aber es fahrt, rüücht ab und zue, uf de autbahnusfahrt berguf muesch is 3 schalte... EASY! Ond es het automatischi Gurte! Inehocke, türe zue: ssssssssstt. Die fahrt so am Türrahme no und schnallt dech grad aa. Huere geil!

Aber geschter isch es eifach no besser cho: Mer send de ganz nomittag (zom zwoite mol) met somene Immobilie makler-Sörfer-Player-Studentadviser Verschnitt in San Diego umekurvt, um en Wohnig zfinde. Mer hend debii scho Lüüt us Brasilie, Iran, Frankriich, USA, Wissrussland, Norwege känneglehrt. Zobig semmer denne go Burritos ässe, denne weder i de riise VAn ineghocket und ad Bay abegfahre. Det seig es Konzert, Las Lobos het Band gheisse. Seit mer an sich au nüt, esch aber en Truppe us de 70er, wo La Bamba noch em Richie Valens bekannt gmacht het. (Au im Kinofilm La Bamba). S'konzert isch also uf em gländ vo somene abartig tüüre Luxus-ferie-resort. Denne simmer also 2 Schwiizer, 1 brasilianer, 1 iraner, und 2 amis. Denne gets es Briefing wiemer gratis is Hotel ineschlicht. Det und det siged Securitys, gschlossni Türe, usw. Mer seiged also eifach Gäscht doo und weled an pool. Ich ha dänk da goht jo eh ned. Ich und de Mirko händ denne eifach mol probiert, send ums hotel ume und händ eifach mol amne iigang inegluegt.. hmm det stoht so eine.. guet en andere iigang. Und wie wenn nüüt wär laufed mer as Tor, möcheds vo inne uf, gönd an pool, ziend tshirt und ose ab (badhose natürli scho drunder) und gönd in pool. Aber ebe: de Pool isch also s'abartigschte woni scho je gseh han. mega warm, belüüchtet, palme rundume. und ebe d'musig vo dere band. det hesch öppe 30 meter längene chönne schwömme.. noch eme ziitli denne i das warme whirlpool wächsle... mmmhhhh. Dem seit mer do jacuzzi. Also ich hett niemeh use wellä. Ich meine, hey, det semmer met so bankers und irne me oder weniger hübsche und junge töchtere im warme wasser ghöcklet.. kei mänsch het s'gfühl dass ned do äneghörsch..
Noch me ziitli chunnt de Steve, ebe de local und immo-hai, met 4 billet, woner ergendwie gratis öbercho het. mer send denne also use, ums hotel ume und dor de hauptiigang wied scheffe as konzert, wo grad i de letschte Züge gsi esch. eifach mega.

Und hött morge... jo do schriibi oich de San Diego Newsletter.

Take care

Mare