Date August 30,
2004
How are ya doing?!
Hallihallo zum zwoite mol. Möcht me weder mälde, bevor ech all die luschtige
und weniger luschtige Sachesächeli vergisse. Es isch jo scho weder es Ziitli
vergange, sit mer im Humphreys s'erschte mol id Pool-Area inegschliche sind.
Natürli hämmer das jetzt scho profimässig im Griff, obwohl ois no nie öpper
so richtig teschtet het. Natürli gömmer nome det he wenn au aaständigi Konzärt
sind näbedraa, es esch jo scho cooler wenn Lüüt wie "Chaka Khan",
und anderi Type wo oich glich vell säge wörded säge wie mer (tschuldigung,
gliich wenig). Aber de Sound isch meischtens ganz verträttbar. Luschtig isch
eifach, dass spötischtens wenn us em jacuzzi stiigsch, eis vo dene
superweiche Badtüechli vom Stapel nimmsch, easy umetschalpisch und dur de
Backstage-Bühneufgang uf Bühni spienzlisch eine vo dene Gäscht bisch.. Mer
händ scho luschtigi Gspräch gha im Jacuzzi, ich sägs oi. Denn wenn mer ami
dete sind ischs Konzärt meischtens gli fertig, so chasch denn all die Künstler
nöcher gseh als die vor de Bühni, wenn si ebe die Stäge abechömed. Wenn
jetzt fendsch das seig chli billig... ich nehme mol aa du könnsch
"Seal", "Macy Gray", "Huey Lewis",
"Righteous Brothers" und "Joan Osborne".. scho easy chömed
die alli no an Pool ;-) Aber ebe... ich säg oi denne wies tönt het.
Was aber vell wechtiger gsi isch ide letschte Täge, isch das mir us dem
Studio 819, dere Temporärunterkunft, (vell ztüür) use händ chönne, ines
eignigs dehei. De Steve, vo dem ich scho verzellt han, het ois jo es paar Täg
metgnoh go Wohnige aaluege. Well er sälber au zöglet het, het er sone
Landlord (Huus-Mänätscher) känneglehrt, wo grad 3 Wohnige binenand frei gha
het. Er het denn im Steve so quasi de Uftrag geh det Intl. Students ineztue,
well da jo no spannend seig. Ei Wohnig het er för sech und sini Mitbewohner
scho gmietet gha, di ander het er 2 Französinne versproche. Di dretti hetted
ebe mer chönne ha. Mer händ die Sach denne aaglueget, und es isch no grüümig
gsi, chli verunstalteti Wänd, chli Löcher im Teppich, chli Gasgruch ide
Chuchi, aber deför es renovierts Badzimmer. Mer händ denne no 1, 2 anderi
Sache aaglueget, und ois denne för die Wohnig entschede. Denn seit de Steve:
Hey, oiches Bad esch jo vell süüberer als das vo dene 2 French Girls. Dene
eri Wohnig isch genau di glich gsi, eifach unde ade Stross, deför met
Meersicht. Logischerwiis send de Mirko und ich eher för Meersicht als för es
superschöns Bad zbegeischtere. Mer händ denne also tuuschet, alli Formalitäte
(esch no complicated im fall..) erlediget, dass heisst sone
"Application" bim Manager deponiert. Denn hämmer nome no ufs
definitive jo gwartet. So wie de Steve und de Manager tönt händ esch klar
gsi dass da nome no Formsach isch die Wohnig öberzcho. Mer send denne go
Sightseeing mache, händ ide bessere Viertel vo San Diego noch Möbel gsuecht.
Velecht chli gnauer: Es het do vell so "Snobs" und
"Kreditkarte-Kids". Die läbed ide bessere Wohnige, chaufed noii Möbel,
bes si umziend oder usekickt werded wells Bankrott sind. Denne stelled sie
oder d'Verwaltig eifach alli Möbel id "Alley", sone chline Wäg dur
die Schachbrätt-Blocks, wo Garageplätz und Müllcontainer stönd. Das heisst
also, mer fend me oder weniger noii Möbel eifach uf de Stross. Die chamer
eifach metneh. Mer send denne also chli dur die Alleys "cruiset"..
met dem geile Auto, Arm dusse und so.. :-)
Ech weiss ned öbs a ois gläge isch, aber noch 15min hämmer öppe s'zwoite
mol aaghalte, well mer en Matraze und es unterbett gseh händ. Und ned öppe
sone RS-Pritsche, sondern ergend sone Queen-Size-Riise-Trampolin-Matraze. Ich
schwöre det het no chum eine droff pennt. Mer händ also es riise Bett gha,
und es abartig chliises Auto. Super gäll. Und id Wohnig hämmer au no nüt chönne
tue. Mer händ si also chli ine Huusiigang inetoo, so dass si ned jede
"Dumpster-Diver" vode Alley her gseht, und en Zättel änegmacht:
"Mer holed das Teil übermorn". En halb stond spöter isches dunkel
worde und mer sind metme ganz guet erhaltne Büro-Polsterstuel im Auto
heigfahre.
Am nächste Tag hämmer also nomol im Manager müesse aalüüte zom
s'defintive Okay öberzcho. Aber oha. Jetzt seit de: Sorry guys, aber de
Bsitzer het scho ander lüüt gfunde wo interessiert sind, het aber nüt gseit
gha. Logischerwiis send mer demet natürli weg vom Feischter gsi. Kei kuuli
Nochbere uf sicher, kei billigi Wohnig, kei Ahnig wohe go. Mer händ nomol müesse
ganz ganz vore afoh met sueche. Ond das isch im Fall abartig müesam. Mer
nemmt sech sone gratisziitig met inserate-Teil, luegt i welem stadteil mer
wett wohne und lüüted eifach allne inseränte aa wo en passendi wohnig händ
womer chönnti zahle. De scheiss isch, dass es paar kei priis inetüend, ander
kei adrässe, und kei Sau seit der dass si eh nome för es ganzes Johr wänd
vermiete. Under dene Bedingige isches verdammt schwer. Ergendwenn hämmer
denne gfonde dass mer gschiider eifach nochme inserätli lueged wo eine scho
en Wohnig het, aber no Mitbewohner suecht. Mer händ denne es paar so Sache
gfonde und per Mail und Telefon aagfrogt. Unterdesse hämmer natürli scho
oisi erschti Woche im Studio819 um 3 Täg müesse verlängere..
"shiiiit" Aber wenns eim rechtig bschiisst, denne het mer doch au
weder mol meh Glück. So hämmer bimne indonesische Roommate chönne iizieh,
er het es 2 Bedroom 2 Bathroom Apartment imne sone Komplex mit Pool, Jacuzzi,
Volleyfäld, Billard, Wöschsalon, BBQ. Det teiled de Mirko und ich ois es rächts
Zimmer. Möbel hämmer nome no Bett bruucht, und en Tisch för zom de Laptop
druuftue. Remember: We still had our officechair in the car. Scho easy simmer
met dem fascht en Wuche omegfahre...
För Bett und Bettzüg und Regal vör de Schrank hämmer au no Stunde ide
Iichaufszentre verbrocht... Aber jetzt hämmers!
Was mer auno händ, isch s'dritte Auto. Also s'erschte isch rot gsi, het öppe
3 Täg ghebt. Denne hämmer ois nochme Elekrische Problem müesse devoo tränne.
s'zwoite isch denne s'gliich in blaugrüen gsi, eifach usse und inne nochli hässlecher.
Deför isches besser gfahre. Was mer aber ned wörkli gmerkt händ isch, dass
hinde kei Liecht gange isch, nome ei Brämslüüchti. Wenn also ned brämst
hesch...: "Hinten ganze Strasse dunkel" Das het ois en Velofahrer am
Rotliecht denn mol gseit, mer händ probiert d'Sicherige usezneh, händ aber
ohni Wärchzüg und met 20 Studentefinger kei Chance gha di rechtig usezneh.
Aber a de Tankstell chunnt denn ergendso en Amerikaneri, liit i oises Auto
ine, rupft uf ahieb 1, 2 sicherige use und seit die seiged alli okay. Si seit
denn no mer sölled hinde d'inneverchleidig gschwind uftue und d'lämpli so
und so useneh und aaluege... Ich ha glaubt VERDAMMT BlÖD us de Wösch
glueget. Aber flecke hämmers (oder eher sie) glich ned chönne.. Mer händ
denne am nächschte Tag WELLÄ zode vermietig goh.. mer händ aber voll kei
Ziit gha, siehe oben... Uf all fäll het aber denne zobig en sone Ami-Cop
hinder ois chli sini Disco-Liechtschou uf em Dach aagloh... super! Hihi, de
Mirko isch gfahre.. ;-) Und obwohl er kei Schauspeler isch, ich hett au ned
gmerkt dass ers ganz genau gwösst het dass ebe die Liechter ned gönd. Mirko
spellt also de Ahnigslos. De Cop glaubts, cha aber chum glaube dass die
Schissi vomne Auto es Mietauto esch, het echli verbarme, seit mer döffe nömme
znacht omefahre ond müends am morge go repariere... UFFFF! Die ide Vermietig
müend chli schmunzle.. söged denne (leider) dass si kei anderi Schissi me händ
wos ois chönd geh, ond mer leider en bessere Chare öberchömed. Macht ja
nix. Jetzt hämmer sogar Automat, Servolänkig, Airbag... supi he!
Am letschte Mittwoch simmer denn am Iifüerigstag gsi för di noie
Internationale. Das isch öppis gsi wo nech me mega gfroit ha druuf. E ganzi
Gsellschaft voll Lüüt vo öberall... alli säged wie si heissed ond woher si
chömed, chli pläuderle.. und halt es paar alti Hase wo au Internationali
Studente sind, eifach scho länger, wo der verzelled wies so lauft do ade Uni.
Natürli hets no müesse sii dass jedi me oder weniger wechtig Person no
Administrativi sache erchlärt, jäno, es paar sache send halt scho zimmli
speziell (oder eher unlogisch/fragwürdig). Aber ich sägs oi. De Campus do
isch eifach de Hammer. Es het eifach alles. Shoppingcenter, Bookstore,
Fitnesscenter so gross wie 3 oder 4 fach Turnhalle.. (oder
nomeh?!)..Restaurants, Takeaways, Bibliothek so gross wies ganze Hauptgebäude
ade FH. Und jetzt wo'd Schuel aagfange het au äntli en huufe Lüüt. Weni
ehrlech ben: Äntlech weder me als ei oder 2 Fraue. Da tönt jetzt velecht
primitiv oder machomässig, aber: Ich has ächt mega vermesst dass ich eifach
jetzt öppe 6 Johr nome met Tüppe id Schuel ben, ebe id Lehr und ad FH. Nüt
gäge mini Mitstudente und die einti oder anderi Frau ide Klass. Aber es isch
doch scho vell natürlecher wenn uf em Campus Manne UND Fraue umelaatsched.
S'Guete a San Diego isch halt au dass s'Wätter verhinderet dass mer allzuvell
aaleit. Aber es wössed sicher alli was ech meine. (Okay, spötischtens jetzt
wirds Niveau tüüfer... sorry) Aber ebe, ganz im ernst, ich gnüsses eifach
zwösche de Lektione oder am Morge ide Bibliothek oder im Starbucks zhöckle
und zghöre: "Ah you're from Switzerland, wow.." "I love your
accent..." (jojo, scho easy... hani Usländer verstande..?"
Aber ich be natürli ned nome zom pläuschle dohe cho. Nei, wörkli ned. Die Kürs
woni nehme sind meh oder weniger krass, um jedefall tüends zemmli blöd weni
halt ned die nötige Körs vorher gmacht ha wie alli andere. Aber mol luege..
Ond bis jetzt hani Professore us Mexico, China, Indie und eine isch glaub doch
en Ami. Mol luege öb ich au säge werde "I love his accent" :-) Und
de "Rajif" Viktor Giaccobo get jetzt also defintiv VHDL a dere Uni
do :-)
Ich wett no schnell allne merci säge för die durs Band nätte Reaktione uf
mis erschte Spam-Mail. Anschiinend versäged jeglichi Filter...
Und för d'Internet Freaks: es git es Programm "skype", uf
www.skype.com met dem chamer öber Internet telephoniere, natürli för null
Stotz. Bide Kontakt chönd er mech allefalls dezuefüege, ich wär de
"marioflory". Es isch aber nome luschtig wenn er es Mikrofon am PC
oder Laptop händ, und wenn möglech Chopfhörer, dass mer ohni Echo cha
plaudere.
Ich wünsche allne vell Spass, Erfolg und Happyness...
Grüessli us em sommerleche schöne lohnenswärte interessante usefordernde
San Diego.
Ich mäld mi weder
Mare